平日午飯時間，港交所（00388）交易大堂門外例牌冷清，但今日可能例外，事關證券及期貨專業總會會長王國安會發動數十名經紀行家，喺今日中午十二點半「圍」交易所，抗議港交所近期連串「惹火」嘅改革建議，行政總裁李小加就冇有怕，將會親自出嚟接信。
王國安話暫時未能預計今日會有幾多人「圍」交易所，但估計都有五、六十人，包括該會嘅理事、出市員及經紀等，佢仲話到時會提出港交所嘅「七宗罪」，包括港股加時、期指加時、收市競價、隱名交易、收窄買賣差價、遙距交易以及花費15億元興建數據中心。佢解釋，港交所斥巨資建數據中心，擔心屆時會加價，增加經紀成本，加上中小經紀唔夠財力與大行喺數據中心設備上鬥，競爭力將會削減。
詹培忠向小加授錦囊
除咗中午示威之外，七大證券組織共三十多人喺立法會議員詹培忠嘅安排下，今晚會喺中總與小加總裁嚟個「鴻門夜宴」。
為咗令飯局喺有秩序下進行，唔會不歡而散，詹培忠尋日下午先與小加總裁私底下會面，仲畀咗3個貼士佢，第一係佢今晚宜只聽意見，唔使發表太多；第二係要清楚講畀業界聽，會顧及佢哋嘅營商環境，因為就算「交易所肯出雞，都要人哋肯出豉油o架」；第三係佢雖然係總裁，但都唔係可以「隻手遮天」，任何決定都要董事局批准。不過，最重要都係「唔啱講到啱」，一人行一步！
余絲韻