市場熱線：好孩子生意唔憂做

尋日下晝市況的確幾恐慌，標普期指一路跌約10點左右，但收市後跌幅已擴大到19點，阿伯聽晚同後晚會去參眾兩院講貨幣政策，佢會噏乜冇人知，如果又話經濟放緩就會死多兩錢重，但如果暗示有QE3又唔同講法。港匯靜雞雞又上到7.8附近，又係大戶「撳錢」嘅訊號。

全球魚缸「債」務纏身

全球魚缸「債」務纏身，包括「歐豬」長命債、美國債務上限、中國地方債。歐豬火燒連環船燒到去意大利，CDS又升到新高，10年長債孳息升到6厘，意大利股市開波已勁插最多4.4%，但跟住跌幅已大為收窄到1.6%。老美國會仍然傾唔掂，按照常理出牌始終會喺最後一刻前大團圓結局，到時大挾淡倉，人世間最大痛苦莫過於沽咗貨之後回升時眼光光。至於祖國地方債亦喺「高估」同「低估」之間糾纏不休，但因為有部分地方債認購不足，所以孖屐又再驚過，建行（00939）喺散戶築起血肉長城之下，亦卒之跌穿6蚊關口。

穆迪呢排係咁追殺，先係話地方債「報細數」唱淡內銀，跟住調低葡撻評級，依家又出埋乜嘢「紅旗」，冇人畀錢請佢哋評級，唔知點解突然間得閒得滯，研究起61間民企，唔通想學「渾水」乎？尋日唔少股民插穆迪報告欠公正、唔夠中立，而班「紅旗」公司更加多得佢唔少，西泥（02233）、旭光（00067）同龍湖（00960）都插一成或過外，最奇怪係龍湖傳批股跟住又否認。

空軍又再出動，沽空金額達75億元，佔大市總成交接近一成。藍籌、國企、紅籌指數成分股全跌無一幸免，中旅（00308）一沉大半年，喺尋日大跌市威番次，古勝上個禮拜推介執到寶，雖然市況唔就，但朝早買入仍有相當水位可賺。大跌股成匹布咁長，但太陽能上游股就烏雲蓋日，呢類股最大買家係歐洲，客戶唔掂，生產商亦閉翳。

憧憬放寬一孩政策

隆成（01225）發盈警即刻狂瀉，隻股喺好孩子（01086）上市時曾狂炒BB車影子股概念，但睇往績其實盈利相當反覆。而好孩子亦變咗壞孩子，現價潛水26.5%。但由另一角度睇，比較上月低位回升20%又衰唔晒。兩間公司其實都係主要做ODM，所以工資上漲同成本價格上升都係死穴；中國業務只佔小部分，內銷應該以好孩子做得較好。

以祖國嘅消費力，遲早會成為全球最大嬰兒產品市場，但「一孩政策」係關鍵，近年好多人大政協建議放寬，不過，咁大件事肯定有排傾。全國最敢開風氣之先嘅廣東，已經向阿爺申請做試點「准生兩個」，條件係夫婦其中一方係獨生子女，暫時唔知阿爺反應係點，但只要條件略為放寬，對好孩子、田雞博士（01698）同就嚟上市嘅田雞王子（01259）都會得益。

古勝