相識在童年，除咗有民歌王子區瑞強之外，梗係仲有七十年歷史嘅維他奶（00345）。維他奶，香港品牌，賣嘅係溫情，熱暖，有一年嘅冬天，一個粉絲送給我的一支熱暖維他奶，簡直係「常在心，暖無限」，正！
不過，除咗溫情、暖意之外，維他奶最令投資者懷念，梗係派足七年嘅特別股息，簡直係為投資者送上一份心意禮物，冧。
誰不知今年「禮物沒有了，股價跌半成」，真係陰功。講真，派咗咁多年，收開股息好Easy，一旦冇咗唔Happy，正常不過。不過，作為維他奶嘅粉絲，唔派股息，最重要係知道個原因，根據公司解釋，原來係要投資生產設施，以便日後增加市佔率同發展阿爺市場，收到。
講真，維他奶，「一支奶品走天涯」，行咗七十年，當中有其他產品出過，不過唔係好掂（情形同益力多一樣），要維持自己的地位，不外乎產品搞搞新意思或者進入另一個市場，似乎維他奶管理層向後者進發，以維他奶個牌頭，加上大家對食品質數嘅要求，其實，維他奶真係有無限嘅空間。
經濟好，成本幾何級上升，絕對明白。近期維他奶工人要求資方加薪。大家立場唔同，明白晒，但人才畢竟係公司資產，加到追到通脹同有機會分享成果，上下一心，維他奶溫情再戰，咁就好啦。
香港大學電子金融服務榮譽助理教授徐燦傑