今時今日只要你將盤生意做得好，就可以將間公司申請上市搞大嚟做，投資者覺得有「錢」途，就肯做你間公司嘅股東。不過，揀股唔可以淨係睇公司名就知係乜股，唔信？你知唔知「鵬博士」係乜嘢股？「向日葵」又係咪農業股？
自從內地推出咗中小板及創業板後，多咗好多唔同行業嘅公司上市，包括有曾經畀人炒到癲晒嘅涪陵榨菜，以及專產瓜子嘅洽洽食品。呢啲公司聽個名都知係食品股，但有啲真係估佢唔到，例如係簡稱「兔寶寶」嘅公司，你實以為會係從事養殖小白兔嘅企業，非也，呢間公司全稱係「德華兔寶寶裝飾新材股份有限公司」；仲有係「金螳螂」，唔通養螳螂都可以上市？或者都得嘅，不過呢間公司原來係做建築裝飾嘅。
咁「向日葵」呢？早前農業股出現大好行情，有人見到呢隻股票仲未畀人炒起，就好似發現寶藏咁大手掃貨，點知所有農業股郁晒，呢隻向日葵依然紋風不動，嗰時至知向日葵係光能科技公司，股民差啲暈低。至於「鵬博士」，佢嘅全稱係「成都鵬博士電信傳媒集團」，唔係做隱形眼鏡架！
余絲韻