絲絲睇到證監會通告，話內地律師潘彩虹被證監會控告9項內幕交易罪，佢尋日冇去東區裁判法院應訊，法院已向佢發出逮捕手令。
證監會話，潘彩虹獲前稱大誠電訊嘅世大控股（08003）委任，處理○九年七月二十七日公布嘅世大配售8,000萬股事宜，當時配售價約有14.5%折讓，而潘氏懷疑喺同月二十三日沽咗165.2萬股，避過潛在虧損，涉額只係約8.7萬元。
證監會指潘氏係內地居民，經常往來中港，但佢喺證監會開始調查後一直未有來港。絲絲記得，當年潘小姐係以世大副總裁身份，喺記者會上講解世大收購鳳山礦業嘅嘢，絲絲已經即時致電潘小姐嘅律師行求證，但未能搵到佢本人。
絲絲嘅律師朋友就話，香港嘅內幕交易罪嚴重在要判監，自從○三年內幕交易被列為刑事罪後，轉捩點係○九年四月首宗內幕交易刑事檢控判坐監成案例，之後多宗內幕交易案無論銀碼大細，只要罪成都要坐監。對金融界嚟講，罰錢事小，但坐監就算坐一日都好慘，絲絲眼見有「賓卡」及「芬佬」自此釘牌及失蹤，真係得不償失。
余絲韻