絲絲講場：招行獲貴客贈400萬蘇繡
永隆銀行及其母行招商銀行（03968）喺剛過去嘅周日搞咗個「夏日矚目賽馬盛事」活動，特登請咗超過30位招行蘇州私人銀行及企業銀行嘅客戶到沙田馬場馬會會員私人廂房玩，有客戶「禮尚往來」向管理層「獻花」，而呢朵價值連城嘅花，係一件中西合璧嘅尊貴藝術品！
根據梵高名畫創作
呢位客戶係蘇州「姚建萍刺繡藝術館」館長姚建萍，係國家級蘇繡傳承人，佢好有心思咁根據梵高嘅名作《向日葵》，創作一幅《向日葵》蘇繡，將中國傳統藝術融合西方著名畫作，仲要配番永隆及招行嘅金葵花（向日葵別名）理財品牌，睇嚟姚館長對於招行嘅服務真係好熟悉兼好滿意。
絲絲打聽過，一幅咁名貴嘅藝術品身價原來高達400萬元，永隆呢份大禮真係收得心花怒放，銀行送禮「回饋」畀客戶就聽得多，但係客戶對銀行滿意要送番禮就好少有，大家依家應該明白點解招行嘅非利息收入，可以年年升幅都好似火箭咁勁啦。
余絲韻