雖然大家對中國科技股有唔同嘅睇法，不過，科技股往往喺經濟開始起飛重拾動力，你見到周圍都係「蘋果黨」同智能手機嘅世界就知。至於企業管治透明度幾時都咁重要，邊個行業都咁重要，係咪？
如果講互聯網感應，馬雲就真係冇得頂，近期「雄風再現」，將手上王牌——淘寶網一拆三，以C2C嘅淘寶網，B2C嘅商城加上搜尋器——淘網。阿媽以集團形式上市，阿仔就各自跑數，邊個跑得好又可以分拆再上市，幾正。
近年，上淘寶網買嘢嘅人，不計其數，最高峰有成八成佔有率，成個餅，又有邊個會唔想食，你見到當當網，國美都開始搞網購，競爭激烈，唔做定前期工夫準備喺市場吸水，點樣繼續「一統山河」呢？講真，十年前B2C個個都話燒錢，依家，B2C又好，C2C又好，有中國百千網民粉絲頂住，點會畀唔到無限嘅幻想畀大家呢？係咪？
有讀過我文章嘅，都知道乜叫「審時度世」，以前嘅阿里巴巴（01688），喺B2B中已經完成咗歷史任務，加上近年阿里巴巴嘅公司管治問題「餘震未了」，都係唔好玩呢隻股住。
依家B2C又好似何家勁嘅舊歌一樣——重頭做起，投資趕時勢，繼續追蹤，出發！
香港大學電子金融服務榮譽助理教授 徐燦傑