尋日絲絲與一個好耐冇見嘅朋友食飯，佢就係中銀保誠行政總裁陳禹昌（Thomas），原來Thomas喺去年底患上氣管敏感，所以少咗出嚟應酬。佢話初時見有啲喉嚨痛，於是去睇西醫，醫生就開咗啲抗生素畀佢，但愈食愈嚴重，轉睇專科都冇改善；之後轉睇中醫，只係食咗一次藥就好番晒，所以佢好佩服中醫嘅博大精深。後來佢驗出根本唔關細菌事，只係敏感，所以食抗生素冇效，更搞到身體弱咗。
依家可以繼續全力搏殺，佢有定期跑步，更經常去行山，上周就喺新界行咗4粒幾鐘。近排天氣咁熱，佢教絲絲飲多啲水之外，更可以帶小量鹽，以迅速補充電解質。
雖然早前Thomas抱恙，但唔代表中銀保誠靜咗落嚟，繼早前向託管資產達25萬元嘅客戶減收0.1%管理費後，佢哋又推出iPhone應用程式（App）。Thomas期望明年強積金半自由行出台後，中銀保誠可進佔市佔率第2位。
余絲韻