絲絲講場：港交所生日「贈興」大摩估見百二蚊
唔經唔覺港交所（00388）已經上市11周年，今日傍晚佢哋會搞酒會慶祝，今年對港交所嚟講都算係多姿多采，除咗推出第一隻以人民幣計價嘅產品之外，仲有外國名牌輪住來港上市，不過幾間外資大行就似乎唔係幾畀面，繼高盛唱淡港交所股價後，大摩亦唔執輸「贈興」一番，仲將港交所目標價大幅削至120元，評級為「跑輸大市」。
港股交投弱削收入
大摩話，港股交投每況愈下，去年日均成交都仲有800億至900億元，但今年以來就縮至740億元，第二季至今以及上月更分別跌至700億及650億元，影響港交所嘅交易費用收入，估計今、明兩年大市成交會分別跌至750億及800億元。
要令收入有突破似乎有啲難度，大摩估計除咗因為交易類收入只有單位數增長之外，投資類收益亦會由於利率處於低位而冇乜起色。成本上漲幾乎係所有行業嘅問題，但港交所推出人民幣產品後，成本升幅可能會超於預期。
港交所股價尋日下跌1.99%，收報156.9元，失守250天線，係去年九月以來首次。
余絲韻