絲絲講場：傳出掌穗貸款公司 張化橋興奮異常
因創立民企指數而獲封「民企之父」美譽嘅張化橋，今年初首推著作《投行分析師嘅叛逆宣言》，敢言作風一目了然，佢嘅叛逆之心更為其投行職業生涯埋下伏筆，有指張化橋今日將正式履任廣州市花都萬穗小額貸款公司嘅董事長，佢亦與密友分享話「不如私奔浪漫，但也很興奮」。
續擔任瑞銀顧問
張化橋縱橫本港投行界多年，曾經出任紅籌公司深圳控股（00604）首席執行官，之後輾轉回歸瑞銀擔任中國投資銀行部副主管後，勢估唔到佢會轉投一間成立只有兩年多、註冊資本僅1.5億元人民幣嘅小額貸款公司。
不過，佢「情迷」小額貸款公司其實早有蛛絲馬迹，佢喺上月斥資3,000萬元購入中國金融（00721）1.46%股權，呢間公司正開拓內地小額貸款及信貸擔保業務。
內地報道指出，張化橋與萬穗方面接觸已有半年多，將來擔任董事長，預計佢要喺廣州、香港兩邊走，佢同時亦會繼續擔任瑞銀證券顧問，情況有啲似「兩頭住家」，唔怪得佢咁興奮啦。
余絲韻