市場熱線：東風吸引力浮現

通常通街睇淡時，魚缸就會殺一殺淡友，但今次唔知點解咁長氣，屬於馬拉松式陰乾下跌，有人歸咎話班輪民包拗頸愈跌愈買牛，古勝一早定咗最低消費係21,500點，依家差唔多已到位，但到位亦未必入貨，最驚係轉咗熊市仲懵盛盛。

美國陷入兩難局面

聯儲局今日開始為期兩日議息，對於有冇QE3會有啟示，對好友嚟講會係一線生機。不過，依家到美國陷入兩難，印銀紙話咁易，但一來會令美金信心崩潰，二來美國通脹已殺到埋身。

煲呔鬼咁聽話，領導人講一句好過民間講到口水乾，居屋唔起又起，地主股即刻冧檔，「四大」有其3都跌3%以上，新世界（00017）同信置（00083）仲齊創52周新低。起居屋都有隻受惠股：中國建築（03311），因為公司接好多公共房屋工程，但公司依家已主力做祖國公屋同居屋（保障房），阿爺上個禮拜落柯打保障房要喺第三季開工，中建築股價立即有睇頭。

呢排乜股都死，連隻鐵股雨潤（01068）都冧埋，綠森（00094）阿媽又畀加拿大報紙唱佢條數假，跌到0.88元收市新低，蒙能（00276）亦跌穿1蚊；晨訊（02000）發盈警料見紅，個幾月內股價唔見咗一半。

浩沙（02200）、中國服飾（01146）同青蛙王子三隻零售新股爭崩頭，雖然消費對象都唔同，但同係睇祖國零售市道，佢哋近日似乎帶起咗部分內需股，例如百麗（01880）、恒安（01044）等。祖國講咗好耐嘅調低奢侈品進口關稅終於有眉目，聽講化妝品高檔煙酒先行，但關稅降幅只係2%至15%，香港價比價依然好有優勢，不過減開有條路，香港零售業唔好坐定粒六。

零件供應問題漸消

祖國上個禮拜公布咗五月份汽車銷售數據，賣車差已預咗，但仲少過舊年同期就估唔到。不過，汽車股股價又唔係咁差，起碼呢幾日跑贏大市，東風集團（00489）仲頂得住13蚊關口，野村早幾日出報告調低東風盈利預測同目標價，但新目標價仍值18蚊，主要係話日本地震搞到零件緊張，會影響東風嘅新車銷售。

不過，日本汽車零件供應會喺下月恢復正常，即係對東風嘅影響只係短暫。依家可趁低吸納嘅抵買股有好多，東風唔算低殘，但往績PE得8倍半，預測PE得8倍，呢排股價硬淨有其道理。老實講，港股幾時可以見底好惡估，揀隻低PE嘅股揸住先起碼冇咁驚。至於汽車銷量幾時可以復甦相信冇咁快，但阿爺亦唔會想個車市死，因為賣車亦牽涉好多周邊行業，對GDP有好大貢獻，故不排除會喺適當時候救救車市。

戰報

中國聯盛（08270）+13%

古晨於本月一日揀咗隻中國聯盛，當日低位只係0.55元，以尋日高位0.62元計，已有近13%進帳。

古勝