絲絲講場：王雪紅以柔制剛
宏達電子（HTC）尋日舉行股東會，小股東為咗一睹貴為台灣女首富嘅董事長王雪紅之風采，幾乎逼爆會場。面對唔守規矩嘅股東擾亂議程、狂問問題，王雪紅耐心咁回應，反而執行長周永明就發晒老脾，仲「寸」小股東：「你以為呢度係立法院咩？可以問一萬個問題呀！」
呢兩日外資係咁掟HTC嘅股份，HTC股價由1,300元新台幣跌到尋日嘅1,070元新台幣。面對股東質疑HTC係咪仲值得投資，王雪紅好有耐性咁話：「營運唔能夠只睇股價嘅高低，仲要睇公司嘅基本面，依家基本面仲好好呀。」
「唔用iPhone只用HTC」
由於有股東係咁搶住發問，激到周永明隔空開火，叫小股東唔好干擾議事進行。現場不時聽到周永明大叫「返埋位」、「畀人哋機會問嘢，唔係就要問到天光」、「如果你咁驚就咪投資」，佢甚至窒股東話：「你以為呢度係立法院咩？」
王雪紅今年初去咗蘋果公司專賣店買嘢畀人認出，尋日有人問佢「蘋果好唔好用？」佢就話「我唔用iPhone，我『絕對』只有用HTC」，佢又話平板電腦Flyer亦較iPad好用得多！
余絲韻