絲絲睇新股嘅招股書會好留意風險因素內容，中國光纖網絡（03777）就有一單好「離奇」嘅訴訟，慶幸依家已搞掂咗。
中國光纖董事長趙兵早兩年安排囡囡喺加拿大一間私立女校讀書，仲親自去當地幫個女搞入學申請，據招股書所講，趙兵唔多清楚嗰邊學校嘅情況，以為大多數家長都會向學校捐錢，所以就想準備筆錢。當時身處加拿大嘅佢帶唔夠外幣，於是搵助手問個朋友借，話要借三十萬美元，點知原來朋友都冇，呢位朋友就拿拿聲再問另一朋友借，終於搞掂咗筆錢。
就係咁搞出咗個「大頭佛」！趙兵嘅助手拎咗呢筆錢後，當時搵唔到趙兵，又冇佢嘅戶口號碼，所以惟有將呢筆都唔知喺邊到嚟嘅錢，暫時入咗中國光纖附屬公司恒裕科技嘅戶口，點知原來呢筆錢係來自一間叫Rockford嘅公司欺詐返嚟，自然搞到公司一身蟻啦，好在最後都冇事。公司管理層就話，依家已請咗專業顧問去改善呢啲內部監控問題，公司仲會向高層進行培訓，又設立管治委員會，希望呢啲事唔會再發生啦！
余絲韻