近年中港金融合作頻繁，兩地監管機構有好多碰頭機會，好似上交所、深交所、港交所（00388）、中證監及香港證監會等監管機構，就會定期按監管合作備忘召開會議，佢哋開會嘅地點有時都好特別，唔會喺傳統辦公室，而上個月嘅會議地點就係四川名勝九寨溝！
九寨溝出名風景如畫，喺嗰度開會可能真係醒神啲，唔信大家睇吓港交所行政總裁李小加，佢去完九寨溝開會後，之後又馬不停蹄去咗美國，早幾日佢接待港澳辦主任王光亞參觀港交所時，仍然精神飽滿！除咗九寨溝外，過往佢哋亦曾經去香港迪士尼樂園、黃山及內蒙等地開會，真係各具特色。
絲絲好奇想知點解要選擇喺呢啲地方開會？原來佢哋覺得開會最好遠離平時嘅辦公室，等大家諗嘢更集中，思維更清晰；其次係可以借呢個機會，增進及培養感情。換句話講，大家彼此信任，溝通都易啲啦。
呢個定期會議係源於多年前5家監管機構簽訂監管合作備忘，規定每季舉行會議，由5家機構輪流主持，主要係商討監管及市場發展。近年開會嘅機構已由5家增至6家，最新加入者係中國證券登記，即係類似香港嘅中央結算。
六月份已過咗一半，下周二（二十一日）係港交所嘅11歲「生日」，當日會有酒會慶祝，財爺將擔任主禮嘉賓，而正喺歐洲、俄羅斯等地訪問嘅主席夏佳理，應該趕得切返嚟主持酒會。
余絲韻