市場熱線：哈動再跌空間有限

由鬼唔知阿媽係女人嘅角度分析，港股走勢不外乎兩個方向，一係就假跌穿，過多一、兩日回升，恢復上落市格局，喺22,500點又築多個底。另一方向係港股繼續向下插，正式「轉角」。

有貨做蟹冇貨等位買

古勝早兩個月已開始嘗試估單邊市，因為照計唔上唔落係有限度，今次會唔會係「狼來了」呢？古勝上個禮拜已沽定期指對沖手上股票，所謂唔怕一萬、最怕萬一。

上周五沽空金額終於低過總成交一成，空軍都要收一收手暫時觀望，好似周五三點過後，個市好似被點穴咁樣，有貨在手嘅已變蟹民，冇貨等低吸嘅亦會睇定啲先。上周四賣地新王撻Q，地主股當日反而上升，到周五至補跌，原因係話金管局預告收市後出招收緊按揭成數，中國海外（00688）五月賣樓滿堂紅，股價升穿晒各條平均線，真係恨死隔籬。

港股陰乾式下跌，但上個禮拜大跌嘅股都有反彈，包括中國無線（02369）、超大（00682）、綠森（00094）等，正所謂吊頸都要抖吓氣，好過中綠（00904）、熔盛（01101）、瑞年（02010）之流連死貓彈都冇力。

講到彈力，滬綜指上周五最多彈30點，臨尾發力微升收市，但自從港股加時之後，港股同A股好似已經脫節。B股未止瀉，等國際板推出就可以完成歷史任務，如同外匯券一樣。

祖國公布咗五月外貿數據，出口增長近兩成再創單月歷史新高，但在下覺得出口遲早大幅回落，聽講好多中小企捱唔住要執笠，以前靠炒股炒樓炒商品維持生計，依家錢莊閂水喉，一鋪清袋。

阿爺原本話上月底會公布個核電安全檢查報告，但依家好似冇咗回事，不過自從15個省批准加工業電費之後，火電又出現生機，哈爾濱動力（01133）雖然呢排亦要跟住個市下跌，但跌幅只算與大市同步，上周五更反彈3%重上8蚊關口，隻股往績PE得9倍，再跌嘅空間只係有限。

火力發電依然有市場

東氣（01072）同上氣（02727）都係核電概念股，哈動主力搞火電就視為過氣，但日本一場地震令形勢改觀，德國率先宣布十年後全面放棄核電，其他國家都被佢嚇窒。跟住祖國前排鬧電荒，迫於無奈要批准加電費，起個核電廠要十幾年遠水不能救近火，啱啱又取消埋風電補貼，所以燃煤發電仍係最經濟最實惠。

哈動股價跑輸畀東氣同上氣已有一段日子，依家風向轉變，哈動好應該威番陣，電力股早排已跑贏大市，電力設備股會較為滯後，跟住接力啱嘴形。

戰報

金界控股（03918）+10%

金界上周五最高見過2.17元，古晨於周四推介時低位只係1.97元，短炒兩日，已有逾一成進帳。

恒芯中國（08046）+10%

小尾上周四推介嘅恒芯短炒又有收穫，以當日低位1.08元上車至周五1.19元食胡，可賺逾一成。

古勝