絲絲講場：恒生薛太撐香港體壇
大家都知恒生（00011）一向好支持本港運動發展，絲絲尋日就去咗恒生乒乓球學院嘅畢業典禮，恒生中國副董事長兼行政總裁薛關燕萍做主禮嘉賓之餘，更以銀行營商角度，妙論如何支持體育發展。
「投資」乒乓球回報高
唔經唔覺，恒生已經資助咗乒乓球運動二十年，一向數口精嘅薛太話總共投入咗超過三千一百萬元，呢項「投資」嘅回報非常之好，唔單只培育咗好多乒乓球好手，更推廣到健康生活嘅訊息。絲絲知道，單喺乒乓球學院活動嘅參與人數，已達十七萬人次。
薛太仲話，銀行營運亦講求可持續發展同把握機遇，所以希望乒乓球健兒可以提攜後輩，令本地乒壇可薪火相傳；而一眾潛質優厚嘅小將亦要把握機會提升技術。
薛太同絲絲講，佢細個時大多數小朋友只能喺飯枱、石枱度打波，但依家嘅設備就好得多，學員唔單只有靚球拍用，連波枱都可以調校高度。咁又係，唔係有專業嘅訓練同配備，又點訓練出咁多乒乓球新秀呢？
佘絲韻