商品大王羅傑斯（Jim Roger）最近喺內地溫州演講，好多時佢都會閒話家常一番先至入正題。今次佢開場白就講話，自己同老婆有兩次環遊世界嘅經驗，其中一次更遊歷咗116個國家。佢話長時間旅行難免會攰，攰就要休息，休息就會有結果，結果就係生咗兩個女囉。
羅傑斯以往都鍾意將兩個愛女「擺上枱」，藉住佢同兩個女嘅生活小故事，分享佢理財嘅大道理。以前都講過，因為羅傑斯睇淡美國，但睇好中國，所以幫兩位千金開戶口都唔用家鄉美國嘅銀行，而要用亞洲區嘅銀行。
所謂儲錢，其實都係爸爸放錢入佢哋戶口，大女Hilton Augusta今年八歲，開始有啲用錢嘅概念，見到今年三歲嘅妹妹Beeland Anderson儲錢仲比佢多，當然唔係好高興，究竟係咪爸爸偏心，畀多啲錢妹妹呢？
呢位爸爸當然把握機會，同大女解釋，係因為佢用咗啲錢嚟買Barbie（芭比）公仔，所以戶口嘅錢咪少咗囉，藉此教佢消費、借錢、同儲錢嘅關係。Hilton聽咗之後，而家就開始好努力咁儲錢嘞。
羅傑斯仲補番句話，儲錢嘅概念，中國人生來就有，但西方人就需要教先至識。咁識討好內地嘅聽眾，呢位爸爸真係名副其實嘅中國大好友。
佘絲韻