證監會行政總裁韋奕禮仲有兩個星期就「go home」 ，呢個職位政府進行全球招聘，引來多名「老外」吼住，絲絲聽聞，主要有兩大陣營：英國幫及澳洲幫，對職位好感興趣，虎視眈眈。咁又係，香港嘅監管制度同英國及澳洲最接近，如要搵老外做CEO繼任人，估計都不出兩幫人之選。
絲絲聽聞，英國金融服務監管局（FSA）早前因為組織功能及架構改變，好多人離職，市傳FSA有好多人對證監會CEO呢個位有興趣。咁又係，韋奕禮來港六年，雖然經常被雷曼投資者苦纏，但今次返老家「衣錦榮歸」，喺英國搵到份好工，事業再上一層樓，都咪話唔羨煞旁人。
至於澳洲幫亦力爭呢個CEO位，市傳不少澳洲證監會（ASIC）高層，包括前主席、甚至現任高層等等，都有被邀請，或者申請進行面試。
市傳其中一名有興趣者曾做過新加坡金融管理局（MAS）嘅澳洲證監會委員Shange Tregillis ，佢去年五月回歸澳洲證監會任委員之前，曾經喺新加坡MAS做過Deputy Managing Director，但係佢有否入圍就唔知了。
有個「澳洲幫」大家好熟悉，就係老家喺澳洲但來了香港多年的港交所（00388）上市科主管狄勤思，市傳佢被獵頭公司邀請過。不過，絲絲聽聞，佢應該對職位冇乜興趣。大家其實不用太心急，估計政府好快就會揭曉。
佘絲韻