港交所（00388）上市委員會一眾委員多數係律師、會計師、投行等專業人士，平時開會要對住大疊大疊文件，話題又技術性，而且開會仲閒閒地幾粒鐘，都咪話唔悶。
今個禮拜六下午，佢哋終於可以鬆一鬆，暫時放低沉重嚴肅嘅上市委員會工作，去到郊外踩單車，為Outward Bound籌款。
絲絲以往好少聽到上市委員會舉行活動為機構籌款，今次都算得上係創舉。
絲絲聽聞，上市委員會今次踩單車籌款，路線會由沙田至大埔，沿途有單車徑，風景又唔錯，對不少上市委員會委員嚟講，應該會係幾好嘅經驗。不過，今個周末天氣可能會幾熱，出席嘅委員可能要做足防曬工夫了！
港交所行政總裁李小加都係上市委員會成員，未知佢今個禮拜會唔會抽空出席呢？李小加平時都好鍾意運動，尤其對足球着迷，成日相約港交所同事，組織足球隊，與業界或者監管機構打波。絲絲相信，踩單車對佢嚟講絕對係易事。
今次活動目的係籌款，絲絲就聽聞，有啲成員會將自己喺上市委員會每年八萬元嘅「車馬費」捐出來，一句到尾，都係想鼓勵更多人捐錢，為善最樂。
佘絲韻