大市陰晴不定，午市回來時淡友攻勢未停，惟轉眼間形勢逆轉，最後仲來個單日轉向，收市微升16點。筆者不敢斷言短期港股就此雨過天青，因A股依然弱勢，但早前睇淡商品市場的高盛，又再轉軚睇好話油價、金價仲有得升，美匯轉弱有利資金流入風險市場。
新上市的嘉能可（00805）雖有一大班名牌基金做其基礎投資者，但股份價位唔細，招股價66.53元，未能吸引本地散戶的注意力，保薦人昨日力撐下都要跌破招股價，收報64.9元。至於米蘭站（01150）升至3元前都要行人止步，昨日勁跌7.7%。米蘭站現市值超過18億元，公司去年賺5,431萬元，單睇PE已經唔低。
期指臨近結算，大市波動難免，連沽空市場都見異動，昨日總沽空金額達63億元，涉及股份數目為427隻，其中滙控（00005）的沽空額便達到9.45億元，佔總沽空額15%，亦佔股份本身的成交35.3%。滙控繼周一跌穿80元後未止瀉，連跌三日，昨日收報78.85元。
恒指昨日低見22,519點，令14隻牛證死亡，現時恒指牛證收回價的密集區下移至22,000至22,499點，相關街貨量達25.87億份，整體恒指牛的街貨日前一度銳減下，已再度增加，最新數量達47.4億份，熊證街貨量只有11.13億份，多寡懸殊。
江西銅業（00358）近日走勢較堅挺，又有高盛報告睇好，往績市盈率13倍，預測市盈率更10倍不到，不妨吼位買江銅比聯購（29372），今年九月十四日到期，實際槓桿7.5倍，行使價27元。
Handsome哥