市場熱線：昆能上升空間兩成

祖國企業來港度水，搞到本地錢莊都要收緊屋仔市場的水喉，素來船頭驚鬼、船尾驚賊嘅孖屐即刻改口唱淡，但最新公布就睇到啲富豪繼續Shopping，四叔周一再買109萬股恒地（00012），誠哥就買咗6.7萬股長實（00001）同2.6萬股和黃（00013）。

中投仍然繼續掃貨

變咗做「金手指」嘅中投真係好疊水，最新搞作係同意認購快上市嘅華能新能源（00958），大拿拿攞6,000萬美金，隻股下個月初會招股。「中投三寶」尋日繼續插，跌得最勁嘅係隻旭光（00067），再冧一成得番3.12元。有「心地善良」嘅缸邊友信錯中投，高位入咗貨，依家惟有癡癡地等。

「高佬盛」呢排頻頻發功，上個月叫人沽油踩冧個市，搞到商品指數勁冧超過一成後，竟然偷學我們的國藝「變臉」，忽然轉軚唱好，今明兩年布蘭特期油由原先睇每桶105美元及120美元，家陣調高至120美元及140美元。「高佬盛」舉動果然把市場殺個措手不及，但憑住佢嘅缸湖地位，大家又焉能唔跟，今次仲加埋「大摩頭」支魔笛，雙雄聯手唱好商品市場，市場一收到風馬上行動，紐約期油隔晚反彈兩個巴仙，金價仲升到去近三周新高，你話一般缸邊友點夠佢哋玩呢？

講完個市，「高佬盛」意猶未盡，一於與眾同樂，講吓佢嘅心頭好，最新報告就睇中隻昆侖能源（00135），將佢放喺確信買入名單之內。報告話內地天然氣消費依家仲係增長周期嘅初階段，估計一○到一五年呢五年嘅複合年增長率達到20%，即係話每年以20%增長速度係咁增加。

阿媽注資陸續有來

昆能有中石油（00857）呢個偉大阿媽睇實，繼去年大手注入資產後，注資應陸續有來，面對的市場不斷發展，背後的阿媽又不斷提供營養，如此優良環境，唔快高長大都幾難。

查實昆能去年已經進行大改造，先後做咗幾單大刁，如去年一月把有虧損嘅石油勘探及開採業務賣番畀阿媽，五月份用5億元人仔幫阿媽買入江蘇液化天然氣公司55%股權後，十月同十二月分別向阿媽買入大連液化天然氣項目及北京天然氣管道公司的部分權益，涉及嘅代價超過200億人仔。

昆能舊年盤數仲未完全反映相關嘅收購，已經煥然一新，盈利由○九年12億元勁升至24億元，增長近倍，若果計埋新收購，油價、天然氣需求等因素的推動，今年預測市盈率降至20倍以下幾乎是十拿九穩。股價尋日威到盡，升4.5%至13.26元至散場，跟高佬盛嘅目標價16.8元仲有兩成半水位，今時今日嘅魚缸環境，如此低風險股份贏到兩成絕對飲得杯落。

戰報

景福集團（00280） +9%

古晨尋日推介嘅景福表現堅挺，炒上高位2.25元，吼中於低位2.06元上車，即日鮮都可賺逾9%。

漢登控股（00448） +11%

漢登尋日一度高見2.4元，跟桃桃於本月十三日低位2.15元上車，最多可賺超過11%。

古勝