絲絲講場：大新太子爺落場做「阿四」
呢排啲銀行好積極開分行，尋日絲絲就去咗大新銀行趁熱鬧，順便探下啲老友，點知見到比較低調嘅大新銀行太子爺、副主席王祖興（Harold），聽聞佢本來話唔得閒嚟，但因為開會延遲咗，加上呢間分行係佢哋今年重點優化嘅項目，所以時間許可下，特登落嚟撐下場。
親自招呼 服務周到
絲絲禮貌地想同Harold換張卡片，點知佢同上次業績會一樣唔記得咗帶，所以佢都好唔好意思，仲親自招呼大家去參觀個VIP區。喺我哋參觀之際，原來佢靜靜雞去拎飲品畀我哋，搞到大家鬼咁開心，仲有人話要好好珍藏支礦泉水喎。
驚喜梗係陸續有嚟，大家好開心咁飲緊嘢嗰陣，Harold又突然拎住啲蛋糕出現，學廣告話齋，今時今日咁嘅服務真係好得啊！PR姐姐話，Harold上次喺業績會講加強投資、證券服務，所以佢哋今年會優化啲分行，之前已經有三間重新裝修，未來仲會陸續有來。
佘絲韻