絲絲同啲輪商好熟，眼見呢排大市成交咁靜局，又傳幾家中資證券行想加入輪證市場戰團，都有啲擔心佢哋啲生意會受影響。
點知瑞銀亞洲股票衍生產品銷售部董事總經理于正人反而話，佢間銀行仲計劃開拓更多市場，所以打算繼續喺外地增聘人手。
講番香港，原來佢哋部門唔只負責輪證，仲有份睇埋上市產品，做本港ETF（交易所買賣基金）嘅流通量提供者，所以都心郁想請相關嘅交易人員。
另外傳統零售銀行渣打張輪枱開咗唔夠一年，窩輪業務都做得唔錯，依家市場上認股證數目已經有161隻，前排仲請埋前主播林燕玲（Ruby）做股票衍生及中介銷售部認股證銷售副董事。
有「小飛俠」之稱嘅Ruby三月正式加盟，前日仲擔任窩輪投資講座嘅講者，嚟緊應該每個月都會講Talk。絲絲第一次同佢食飯，發現佢口才好了得，無論對政治同財經新聞都好熟悉，相信講Talk對佢毫無難度，遲啲落證券行面對散戶，都應該好傾得埋。Ruby笑笑口話份新工好有挑戰性，相信假以時日，佢會成為「新一代輪后」啦！
佘絲韻