因為「爛豪宅」THE ICON貨不對辦風波而「聞名」嘅發展商榮豐國際（00063），原來除咗令小業主唔滿意外，其小股東亦一肚氣，有小股東同絲絲講，佢哋唔滿意公司「調走」資產，同公司抗爭咗四年，佢哋仲話唔通要學雷曼苦主咁，日日瞓喺公司門口先可以解決問題。
尋日喺榮豐嘅股東會後，小股東話公司喺○七年嘅時候，將最值錢嘅資產，即港島山頂馬己仙峽道嘅兩個豪宅項目，轉讓咗畀一家非上市公司鴻福地產，跟住用一比一嘅方式，將鴻福嘅股份當股息分派畀小股東，令到榮豐嘅價值大縮水，換來嘅鴻福股票就好似廢紙咁，好難套現。
小股東一直都反對公司嘅做法，只係勢孤力弱，好似佢哋提出三個解決方案，一係鴻福變賣資產，套回現金派畀股東；二係公司回購鴻福嘅股權；三係將鴻福嘅資產注入榮豐。三個方案榮豐都反對，只係提議喺公司內部設立個「交易平台」，畀小股東自己去買賣鴻福嘅股票，公司咁樣「打發」小股東，當然令到佢哋怒氣沖沖，不斷同絲絲吐苦水。絲絲好想知榮豐嘅管理層對小股東嘅不滿有乜回應，點知佢哋開完會就即鬆，自動放棄平反機會。
佘絲韻