期指觀瀾：守22635再開好倉
即使無留意港股走勢，單是見到前日大跌488點，昨日只得19點反彈，多少感受到港股之弱勢，恒指昨日收報22,730點，升19點，成交得524億，唔計半日市，乃今年最低紀錄，可見好淡雙方齊齊靠邊站。
期指轉倉關係，成交未致於縮水得太過分，五月合約成交6.7萬張，高過上周五的4.97萬張，不計早市測試好友底線，淡友在現貨開市一刻將期指推到22,629點，全日交易大部分時間集中在22,660至22,740之間的80點內進行。
幾隻中資銀行股下月除息，形成六月合約大低水的假象，以收市價22,551點，實際比除息後理論價22,563點，只係低水12點，近期大戶做淡的一方相對積極，但斷唔會無理智到以179點低水轉倉。
市場焦點係估大市要見22,400至22,500點殺盡牛證，客觀看，市面尚餘的牛證，街貨量十分低，筆者並唔認同大戶有需要咁做！做淡的先機已失，筆者繼續等候短期見底再做好倉的機會。假如未來兩日現貨在22,635點形成支持，筆者會開始四分一注試買。
John Mullen