市場熱線：中國食品搵位上車

花旗魚缸隔晚插咗百幾點，周一港股高台跳完水後，尋日未有再跳，仲平地跳吓舞，上上落落叫人睇到悶，反彈19點，埋單計數原來都係用咗524億銀。

「高佬盛」又再出招

個市咁差，唔單止評分機構想做低個市，大孖沙「高佬盛」早前叫人沽油，搞到商品孖屐大震盪後，佢再度發功，調低中國GDP增長預測，今明兩年由原先的10%及9.5%調低到9.4%及9.2%，仲估通脹未到頂，又將國指年底目標降到14,500點。報告一出，缸邊友的驚恐指數再度升溫，更加冇心情撈底。

大市成交縮，最受影響嘅當然係港交所（00388），但佢一於「話之你」，國際派對愈玩愈開心，名牌「趴地」同做旅行篋嘅新秀麗都會嚟吸水，上市保母已經好積極咁搞相睇大會。不過，全球商品交易一哥嘉能可（00805）今日上市，走勢差過本地薑米蘭站（01150）一大截，尋晚暗盤「枱底價」跌1.84%，一手貨要蝕123蚊。隻股公開派貨部分係百分之一百，即係買幾多有幾多，如果上市保母唔出嚟維持吓秩序，咁大家就買得多蝕得多。

五月未過，孖屐已經玩緊估數字遊戲，估通脹未升完，退任後快活過神仙嘅白頭任又發偉論，話祖國依家仲係負利率的狀態，人行加息無可避免，睇怕魚缸今勻要過一個難捱的夏天。

通脹下荷包縮水，要慳錢可以買少件衫，但基本食糧唔慳得，食品股一向都被視為防守股，每每成為跌市奇葩。近排食品股表現堅挺，原因係大家估緊依家仲係高到怕怕嘅通脹就快見頂，有利一向被中央㩒住唔准提價嘅食品股，去年大落後嘅食品股，今年有望大翻身。

中國食品（00506）今年二月底時跌到最低得4.33元，跟住就悄悄跳彈床，三月份魚缸畀地震搞到大插插時，佢仲頂住無跌，四月份好精神咁升到6蚊邊，近周稍為橫行似欲突破。

今年業績惹憧憬

中食本身經營紅酒、包裝食油及可口可樂瓶業務，舊年因為改用新模式銷售紅酒業務，業績倒退，但公司有阿媽中糧睇實，衰極有個譜，趁住外圍唔掂出外收購，年初買咗波爾多其中一個酒園，一於將產品升級，加埋飲料業務的新生產線搞掂年內啟用，今年大有機會做番好份成績表，係時候睇實隻股，揀定位上車。

戰報

東方表行（00398）+10%

古晨本月十二日推介嘅東方表行抗跌力強，當日低位4.18元上車，昨高位4.6元食胡賺逾一成。

馬斯葛（00136）+11%

帥哥周一推介馬斯葛續有追捧，以當日低位0.52元上車，至昨日0.58元高位食胡，最多賺逾11%。

古勝