絲絲講場：平保再聘「外腦」任首席創新執行官
喺絲絲記憶中，平保（02318）係擁有較多外籍人士嘅內地金融機構，佢哋形容呢類人士為「外腦」。平保尋日再委任多一名「外腦」高管，令到目前佢哋嘅九大高管中，有5位為「外腦」，佔超過半數。
計葵生兼掌平安財富通
今次呢位新聘「外腦」嘅職位係「首席創新執行官」，絲絲未聽過有呢個工種，經平保老友介紹後，先知原來係內地金融機構首設，職責係分析及洞察金融業進步嘅趨勢與方向等，坐呢個位嘅係美國人計葵生（Gregory D. Gibb），佢會兼任平安財富通公司董事長兼CEO。
老友形容計葵生具有典型嘅美國人性格——開朗、聰明、思路清晰，擅於將複雜嘅問題簡單化。計葵生喺美國出生，喺歐洲長大，有21年大中華地區工作經驗，講普通話仲流利過絲絲；佢曾經喺麥肯錫嘅新加坡、香港及台北公司工作，曾擔任麥肯錫大中華地區董事，又做過台新金融控股首席運營執行官。
平保點解咁有創意，整個「創新」職位出嚟？原來佢哋認定，技術創新及其應用係公司競爭力嘅關鍵。
余絲韻