絲絲講場：皇朝傢俬內銷賺人仔豐收
剛啱喺上個月攞咗香港金像獎影后嘅劉嘉玲，佢代言嘅皇朝傢俬（01198）尋日有個簽約儀式，不過大家唔好誤會，皇朝傢俬唔係同劉嘉玲簽約，而係簽約喺江西省買地建生產基地。
查實劉嘉玲做咗皇朝傢俬代言人已有一段時間，但要每年續約，皇朝傢俬CEO馬明輝就笑言希望佢續約時唔好加價。計絲絲話，以劉嘉玲嘅級數加上仲做埋影后，就算加價都抵啦。
江西買地建廠
皇朝傢俬經營產銷家具生意，依家人仔繼續升，絲絲好關心馬總係咪好大壓力，點知佢話唔係，因為佢哋主要做內銷，人仔升值反而有利，公司仲可以派多啲息。不過佢話有個做電子出口嘅朋友就牙痛咁聲，皆因人仔升值令佢被外國人係咁壓價。
講番尋日嘅簽約，皇朝傢俬用6,000萬元喺江西省南昌市買地建廠，第一期佔地23萬平方米，首期先投資2億元，預計喺明年第二季投產，新廠房嘅年產能高達24億元。馬總話，佢哋今年首季嘅銷售好可觀，已達到目標，佢仲話潮流興環保，舊傢俬回收行業有得諗，唔排除日後喺呢方面發展喎。
余絲韻