絲絲講場：鄭海泉告別股東會
香港華人大班傳奇鄭海泉（Vincent）退休在即，尋日佢最後一次以滙控（00005）執行董事身份出席香港嘅非正式股東大會，話晒做咗33年，佢真係好唔捨得，但仍不忘發揮幽默本色，話多謝滙豐畀機會佢喺金融界學咗好多嘢之餘，喺滙豐做令佢可以「養妻活兒」喎。
對新管理層有信心
絲絲尋日亦有特登去見吓Vincent，雖然佢講嘅嘢唔算多，但精神就相當唔錯，佢話會親自出席下周喺倫敦嘅股東會，開埋呢次會，就會正式退任執董轉做顧問。
Vincent早前決定退休，佢坦言離開滙豐係唔容易嘅決定，不過好榮幸可以喺滙豐服務33年。滙控行政總裁歐智華就話，Vincent唔係完全離開滙控，之後都會擔任顧問角色，特別喺亞太區事務方面，相信會提供唔少意見。Vincent亦大讚滙控嘅「戰友」，又話對新管理層好有信心，相信會繼續孕育更多成功嘅銀行家故事。
Vincent退下來之後，滙控嘅華人色彩好似減退不少，但歐智華話，其實滙控仍有好多出色嘅華人管理層，例如王冬勝、黃碧娟、恒生（00011）行政總裁梁高美懿等。
唔知喺咪有好多老股東唔捨得Vincent，尋日出席股東會嘅有唔少係上咗年紀嘅股東，歐智華話目前無數據顯示滙控股東有老化迹象，笑言可能因為尋日唔係假期，所以只有退咗休嘅股東先至有時間出席股東會喎。
余絲韻