市場熱線：中金再生乘勢起動

阿爺閂水喉，香港銀行亦大叫水緊，間接累到魚缸交投，尋日港股升152點報23,163點，全日又係有波幅無升幅格局，成交634億元悶死唔少卜架。樂觀去睇，花旗同祖國魚缸雙雙低位搵到支持，恒指周初插穿22,985點雙底，淡友居然出奇咁斯文，冇乘勝追擊，加埋尋日收市指數假假地「嘜」咗喺10日線23,143點樓上，只要外圍四平八穩，足以吸引「間尺黨」入市，推番個市上23,500甚至23,800點附近都唔出奇。

基金股輪流被洗倉

近期基金股走勢都幾誇張，中國無線（02369）發盈警，單日插29%收報1.99元，重返一○年初起步位，元氣大傷下，要炒番上去唔易。早輪被傳大股東減持後大插的旭光（00067），繼續跟市反彈3%收報3.87元，但古勝收到風，有外資大孖沙在4元左右接重貨，如果升唔穿要小心。

另一隻被洗嘅保利協鑫（03800）就無咁好彩，股價再殺一成見4.09元，返到三月中水平，成交4.7億股係一年半以嚟最勁，缸邊消息話上個月4.72元接貨基金應付贖回要被迫清貨，不過，當時只係批1億股，尋日咁大場面係咪套現咁簡單？有云話寧買當頭起，空手入白刃等高難度動作，都係免得就免。

隔晚金銀油價有喘定迹象，資源股走勢靚番之外，就連金屬收買佬中金再生（00773）都鑊氣再現，無他嘅，中金再生做的是廢金屬回收生意，賺嘅係中間的加工費用，即使做足對沖，商品價格太波動，成日出現「閃跌」只會令風險增加，最理想係商品價格維持高位穩定發展，只要加工毛利率，生意額及利潤自然會按金屬價格上升，愈做愈大。

不斷購併壯大實力

祖國經濟高速發展，對各類資源需求不斷增加，今年是「十二五」規劃開局年，節能減排之外，中央重點提倡資源回收再用，視此為重要發展產業之一。而且基於環保考慮，廢金屬回收行業監管門檻不斷提高，加上近年銀根吃緊，催化高資本需求的回收行業整合，像中金再生這等巨型廢金屬回收商，透過收購中小型競爭對手，以及改善物流供應鏈，生意愈做愈大，睇番去年營業額225億元，三年來足足增加10.6倍，認真快高長大。

公司早前透露發展藍圖，會繼續透過購併現有回收場，達成五年後在全國廢金屬回收市佔率翻一番去到7至8%，以今年市盈率8倍左右，再考慮埋增長潛力，估值唔貴。尋日股價剛剛重返股東批舊股作價10.6元樓上，反映貨源增加的因素已完全被消化，如果成功突破11.7元的52周高位，將會進入無阻力區。

戰報

昊天能源（00474）+23%

古晨周一推介昊天能源果然有料到，尋日炒上0.91元，以當日低位0.74元計，跟到足賺近23%。

中航科工（02357）+10%

小尾上周五吼中嘅中航科工，尋日一度高見5.21元，跟佢於當日低位4.73元上車，最多賺逾一成。

古勝