隨着iPhone及iPad嘅面世，好多人嘅生活習慣改變咗，就連幾歲嘅「豆靚」都貪佢哋「樣靚聲甜」，成日攞住嚟玩，將以往被認為益智嘅兒童電子玩具放埋一邊，做呢行生意嘅偉易達（00303）就惟有改變思維，睇住蘋果公司嘅產品嚟出招。
偉易達CEO黃子欣喺生產及設計兒童益智玩具呢一行做咗幾十年，佢話依家面對平板電腦及智能手機嘅競爭，真係好難做，因為呢啲產品嘅遊戲非常多，連幾歲嘅小朋友都吸引埋。根據佢嘅觀察，細路仔有個特性，就係家長有乜佢哋又要有乜，最慘係好多家長鍾意攞部iPhone或iPad出嚟，要啲細路收聲，唔使嘈住晒。
為咗爭番呢個市場，黃子欣度咗條橋，就係將大人玩嘅嘢，變為細路仔版本，例如V.Reader其實係Kindle嘅小童版；今年秋季會出嘅InnoTab實情係兒童版嘅iPad，呢款產品有齊晒輕觸鍵、多媒體功能以及可以下載Apps，仲可以畫吓公仔；MobiGo呢款玩具就與智能電話差唔多。當然呢啲玩具嘅價錢，就平過大人嘅「玩具」好多啦。
喺度橋之前，黃子欣同埋班手足做咗唔少功課，甚至曾諮詢專門研究兒童習性嘅專家。佢又發現，美國及中國對於兒童玩具應有功能嘅意見差別好大，美國認為樂趣及學習功能應各佔一半，而中國就認為比例應該係5%及95%。
余絲韻