絲絲講場：朱李月華閃爆
金利豐正式注入上市公司黃金集團（01031），仲改埋名做金利豐金融，尋日喺四季酒店開酒會，好多城中名人都畀面到場，但最搶眼嘅仍然係女當家朱李月華，佢一身火紅色套裝，戴上全套鑽石耳環、頸鏈及戒指，粒粒睇嚟都有十幾卡，閃爆全場，但佢竟然話呢啲係朱生送嘅「朱義盛」喎！
絲絲與朱太傾偈，不斷畀佢啲首飾閃到眼都睜唔開，忍唔住問佢套首飾要幾多千萬。朱太就笑到好甜咁話：「係老公送o架，佢話係假嘢喎！」絲絲明白男人送嘢畀至愛，愈名貴就愈係會話係流嘢，絲絲都希望男友送啲咁正嘅朱義盛畀自己。
金利豐搞緊內企IPO
朱太話，金利豐成功引入平保（02318）及西京做策略股東，將來有好多合作機會，而成功變身上市公司，就有個平台進一步發展金融業，今年目標係引入外國企業來港上市及投資中港市場，希望引入東歐、南美及非洲公司，特別係資源企業來港上市，依家就處理緊兩家內地企業來港掛牌。喺酒會上，朱生、朱太就特登請「金牌莊家」詹培忠上台講番兩句，你話詹議員幾有分量呢！