絲絲講場：「四太」着緊澳博股價大過天
「四太」梁安琪尋日捧佢姊妹朱太（朱李月華）嘅場，無論佢去到邊，都會畀人問到「賭王」嘅健康狀況，唔知係咪答到有啲悶，絲絲見到「四太」唔想直接答，佢話大家睇到賭王早前出席日本賑災活動嘅情景，就知佢身體幾好啦！
至於早前各房爭奪嘅Lanceford股權分布，「四太」就話最緊要了解自己公司（澳博（00880）），「其他嘢了解嚟做乜？唔關我事嘛，我好唔得閒o架，最緊要做好自己啲嘢，最緊要我哋嘅股票係咪節節上升」，佢轉頭就即刻走咗去問澳博股價收報幾多。
市佔三成已好滿意
另外，「四太」亦透露澳博路氹城項目正搞緊，希望申請可以盡快獲批。澳博去年市場佔有率有35%，「四太」都話覺得競爭好激烈，佢謙稱話保持到三成就已經好滿意。講番澳博股價，自從Lanceford股權分布清晰咗之後，股價已拾級而上，上周仲曾創新高，升到接近16蚊。