和黃（00013）嘅3G去年取得佳績，「超人」李嘉誠又形容公司嘅業務前景秀麗，作為李生得力助手嘅霍建寧當然出咗唔少力，和黃年報顯示，霍大班呢位打工皇帝去年就獲加薪23%，令去年所獲嘅薪酬增至1.53億元；除咗霍大班外，身兼長實（00001）及和黃副主席嘅李澤鉅，去年喺系內公司所獲嘅總薪金亦突破一億元大關。長和系內同時有兩位管理層獲過億元人工，喺本港上市公司嚟講都可算係另一紀錄！
3G有錢賺，和黃港託分拆成功，加上近期熱爆嘅匯賢（87001），長和系管理層為股東賺取回報嘅能力可見一斑。霍大班去年嘅基本薪酬雖只係略增7萬元，至1,029萬元，但與表現掛鈎嘅花紅就比之前一年增加26.1%至1.41億元，加上袍金、花紅及公積金，整份人工就達1.53億元。
絲絲參考埋長實嘅年報，亦留意到李澤鉅去年喺長實共收取5,061萬元嘅薪酬，計入佢喺和黃以及長建（01038）所獲嘅薪酬，再扣除部分「上繳」予公司嘅金額，李澤鉅去年喺公司實收嘅人工，由對上一年嘅8,959萬元增加至去年嘅1.03億元，正式成為長和系內第二位人工過億元嘅管理層。
講開為股東增值，港交所昨日嘅資料亦顯示，由李嘉誠與和黃共同持有嘅加拿大赫斯基，原來喺四月初已派發去年嘅股息，而透過以股代息嘅安排，李嘉誠與和黃所持嘅赫斯基股權比例由70.74%增至70.94%，以每股嘅平均市價為29.393加元計，所收嘅股份已值15億港元，所以話長和管理層收咁貴人工，亦的確有其道理！