市場熱線：雷士照明發光發亮

匯賢招股時間有9日咁多，可以慢慢睇定先，老實講4厘息唔算好吸引，古勝一向有北上做人仔定存，3個月息有2.85厘，如果做兩年以上定存，息率更加有4厘幾。雖然好多專家建議長線投資，但老古反而覺得短炒有睇頭，話晒係人仔股票頭炮，通常做親頭炮都要有示範效應。

經緯H股有力破關

滬綜指微跌7點，但由高位計則跌38點，三月賣車銷量增長唔夠6%，汽車A股跌得較勁，但香港上市嘅汽車股反而有得彈，兩地炒股模式唔同，香港股民喺壞消息前已預先沽貨，到壞消息公布時就人棄我取。不過，經緯紡機A股幾乎升停板，收市仍升8%，H股（00350）則只係升2.76%，8蚊好似幾大阻力，但公司上個禮拜已發盈喜，下個禮拜派首季成績表起碼賺每股2毫人仔，PE有數得計，等阿媽完成收購立信（00641）之後又有重組概念，遲早會發圍。

青啤（00168）又話唔准加價，但兩日踢高超過一成；食用油又話延長凍結售價兩個月，中糧（00606）先低後回穩。祖國要控制通脹，依家乜招數都出齊，弊在商品價格創新高形成輸入型通脹，所以焗住人仔升值，人仔每日創新高好似懶勁，但每日只係蟻躝式上升，相比美金狂瀉，人仔其實算升得少。

雖然通脹勁，但內地零售股繼續炒，尋日追落後嘅有新百貨（00825）、匯銀（01280）同達芙妮（00210），古勝數落未升嘅百貨股得春天（00331），佢個姐妺寶姿（00589）成績表夠晒差，但業績後亦由18蚊升到21蚊樓上，春天可以瞌埋眼炒落後。

「311」地震已經過咗一個月，但福島核電廠仲有排未搞掂，搞到其他國家談核色變，冇咗呢種最慳錢能源，傳統油氣煤能源即刻身嬌肉貴，所以慳電產品未來大有市場，幾隻節能燈股呢排個別發展，雷士照明（02222）、真明麗（01868）同達進（00515）派完成績表都冇好結果，但賺多4倍幾嘅雷士主要係跟手有股東批舊股才有輕微回吐，不過尋日已率先回升5%，重上4蚊關口。

現價放長線釣大魚

今次雷士有股東以4.03至4.12元批股，折讓得3%至5%，呢個折讓幅度仲少過藍籌股，相信係批畀友好人士，順便震一震貨再重拾升軌。雷士預計今年嘅增長前景仍然唔錯，除咗大家會用多啲節能產品之外，今年好多保障房落成，新屋未必買新傢俬同新電器，但一定要買燈。

雷士一○年PE係19倍，由於基數已高，今年好難再有倍數增長，但有幾成增長嘅話，預測PE已變得幾吸引，呢個價錢買入風險偏低，有長線升值格局。

戰報

大成生化（00809）+47%

大成生化尋日高見1.78元，古晨早於上月二十九日已吼實，於當日低位1.21元上車，勁賺47%。

中亞能源（00850）+15%

桃桃尋日推介嘅中亞能源，炒上高位0.485元，吼中於低位0.42元上車，即日走番轉都賺逾15%。

古勝