香港資源（02882）執行董事徐傳順依家正靜待乖女──「千億新抱」徐子淇再做媽咪之際，佢喺尋日兒童節就破咗小財。絲絲睇到香港資源嘅通告話，收到徐傳順通知，尋日東區裁判法院因徐傳順未有及時披露出售香港資源股份，被判罰款42,000元，又要向證監會支付調查費28,625元。
徐傳順解釋話，冇披露係由於對上市規則第348（1）（a）條嘅誤解。其實呢7萬幾蚊對「徐老爺」嚟講只係小數目，同時絲絲亦相信，徐老爺應該真係唔熟上市規則，或者忙於照顧乖女而貴人事忙，唔記得「溫書」。不過絲絲心諗，徐老爺老友兼香港資源主席黃英豪出身於大律師世家，請咗徐老爺做執董，都應該要同佢補習吓上市條例。
絲絲睇番香港資源嘅猛人董事班底，仲包括執董許浩明及獨立非執董伍綺琴，兩位都係當年港交所（00388）高層，其實都可以幫手提點吓，或者索性開班教吓市場規則。
余絲韻