市傳全球最大商品交易商嘉能可（Glencore）將喺月底展開於倫敦及香港集資額達100億美元嘅上市計劃，佢哋嘅一舉一動備受關注，英國傳媒尋日就話，嘉能可嘅高級職員去年共獲逾9.38億美元（73.1億港元）嘅花紅！不過，嘉能可即刻解畫話，呢9億幾美元其實只係員工多年嚟辛苦累積所獲嘅獎勵，而且員工要做到退休先有機會獲發有關獎金，呢班員工聽到唔知算唔算空歡喜一場呢？
呢個咁烏龍嘅消息，相信出於外界對於嘉能可財務數據嘅誤解，事關英國媒體引述嘉能可嘅債券持有人話，嘉能可約60名高層員工去年嘅基本薪酬共約1.46億美元，不過佢哋亦另有9.38億美元嘅花紅。如果照報道咁計，嘉能可呢批高層嘅人工，分分鐘拍得住華爾街大行，所以報道一出街，嘉能可就急急解畫，話報道所引述嘅數字，其實係代表呢批員工喺公司工作多年，所累計嘅退休獎勵，亦即係話有關員工一定要到退休先有機會獲分享有關成果！
余絲韻