尋日係四月四日兒童節，滙豐環球投資管理4位高層咁啱約咗絲絲及幾位好友，喺滙豐總行44樓食晏，唔單只呢堆數字好脗合，就連大家嘅話題都應吓節，講吓小朋友。
滙豐環球投資管理署理亞太區行政總裁蘇浩文（Edmund Stokes）有兩個仔女，佢係英國人，但原來佢好重視普通話，所以佢嘅8歲囝囝及6歲囡囡每日都會用約一個鐘頭時間學普通話，可謂「入鄉隨俗」。
絲絲以為Edmund「煲冬瓜」一定係頂呱呱，但原來唔係，佢除咗英文外，亦學過多種語言，如德文、荷蘭文、日文，偏偏就冇學普通話。佢話雖然學咗日文，但差唔多有成20年冇應用過，依家已經唔係好熟練嘞，依家諗番轉頭，嗰時應該學普通話而唔係學日文！
佢話希望遲啲有時間學普通話，計絲絲話，佢兩個心肝寶貝日日操練普通話，隨時可以教爸爸「煲冬瓜」，掉番轉頭做爸爸嘅老師喎！除咗「入鄉隨俗」學普通話之外，Edmund又話好喜歡香港嘅人、天氣及食物。
講番滙豐，Edmund話亞太區管理資產淨值今年目標增長15%，並會增加10%人手（唔計內地）。
余絲韻