近期市場有關僑豐金融行政總裁許照中「榮休」嘅消息此起彼落，絲絲立即向許照中求證，佢話喺工作上的確將有新安排，好快會由行政總裁榮升為副主席。
佢解釋話，僑豐金融已發展咗6年，喺證券等金融服務業上已有一定地位，表現穩定，為咗配合母公司喺亞洲區內銳意發展投資銀行模式，香港公司方面亦要尋求進一步發展，將加入更多有投資銀行經驗嘅新血。
許照中多年來領導僑豐出任行政總裁，佢坦言到咗六十幾歲呢個年紀，唔想再管行政、運作等日常事務，倒不如主力協助公司繼續發展業務，好似零售及期貨等。
許照中係公司股東之一，與公司關係可謂唇齒相依，新安排既可協助公司發展業務新方向，佢又可以繼續有時間做公職，確係「Win Win」（雙贏）。
余絲韻