每年恒地（00012）公布業績後，李兆基（四叔）都會例牌增持公司股份，絲絲尋日睇聯交所網站，果然見到四叔用咗約2.8億元增持恒地，唔怪得恒地股價呢兩日咁堅挺啦。
恒地喺上周四公布業績，四叔就喺翌日以平均每股47.055元，增持595.2萬股恒地，持股量由65.35%增至65.62%。四叔喺第二日就增持，新買呢批股份仲趕得及有息收添，恒地派末期息7角，淨係呢批股份就可以收息416.64萬元。四叔最新揸住14.279億股恒地，可收末期息近10億元，依然係收息之王！
恒地大公關Bonnie同絲絲講，話四叔真係好錫公司o架，如果好價相信會繼續增持股份添。
佢又爆咗四叔一個秘密，話說去年恒地業績報告內，四叔寫嘅主席報告喺國際ARC年報大獎中獲獎，讚佢資料詳盡又透明度高，所以今年四叔加倍努力，約齊各部門開咗幾次大會，然後親自操刀撰寫主席報告，足料有成30頁紙，係絲絲睇過咁多上市公司主席報告中最詳細嘅。
余絲韻