內地企業人事變動好平常，有啲係調去其他企業，有啲就調去做官，最新例子係中石化（00386）董事長蘇樹林，市傳佢會調去福建省做代省長兼省委副書記。絲絲嘅老友話，呢單料喺中石化系內早有聽聞，大家亦早有心理準備，但邊個會頂替佢做中石化董事長，就反而冚得好密實，與以往早已揚開晒嘅做法好唔同。
早喺○七年六月，蘇樹林臨危受命空降中石化出任總經理職務之時，中石化系內早就話佢後生有為，佢係「60後」，四十幾歲做到相當於正部級嘅職位，歷練又多，喺大慶石油學院畢業後，做過大慶石油管理局局長、中石油集團副總經理、遼寧省委常委及組織部部長，絕對係國家重點培養嘅人才。曾與蘇董共事嘅人都讚佢做事有魄力，又有豐富嘅管理經驗，呢幾年將中石化搞得有聲有色。
石油石化系統可謂人才輩出，好似剛退休嘅國資委主任李榮融就係出身於中石化系，海南省省委書記衛留成就出身於中海油。
余絲韻