絲絲講場：朱李月華 阿仔也錯認
黃金集團（01031）行政總裁、金利豐老闆娘朱李月華（朱太），喺香港金融界應該冇人唔識，早前佢以120億元即係市盈率高達65倍嘅作價，將金利豐注入黃金集團，變相令金利豐借殼上市；佢以前又做好多大型配股，可見佢幾咁能幹，之不過女強人原本都有大頭蝦嘅一面，尋日絲絲就目睹一宗「阿媽認錯仔」嘅趣事。
話說朱太尋日為咗金利豐單「刁」舉行股東會表決，絲絲同佢傾咗一輪，問點解唔見佢嘅乖仔朱俊浩（Kingston）？喺呢個時候，朱太就對住一位企喺遠處嘅後生仔叫Kingston，不過對方愈叫愈走，先知原來嗰個唔係Kingston，朱太竟然認錯人！
引入策投冀唔只泵水
佢老公朱沃裕就笑言，其實朱太都唔係第一次咁蝦碌，仲試過認錯朱生自己，又試過上到車見到司機唔同咗樣，先知認錯自己部車！聽落真係幾搞笑，估唔到日理萬機嘅朱太都蝦碌得幾可愛！
金利豐完成借殼後，將成為最大嘅本地上市證券行，朱太話嚟緊會陸續增聘人手。佢有咁多富豪朋友，會唔會引入策略投資者？朱太話未有細節，如果有嘅話，希望唔係淨係資金嘅支持，而係可以喺公司業務上有合作。
余絲韻