市場熱線：中石油炒作概念多

幾大水泥股全部創新高，舊年第四季限電兼逢建屋旺季，所以帶動水泥價格兼帶起埋業績，今年又有千萬套保障房要起，買呢類股較有渣拿。而大戶永遠同散戶對着幹，散戶愛股祖國移動（00941）同國壽（02628）股價好似蟻躪咁，反觀聯通（00762）、中國太平（00966）、財險（02328）等股就係咁升，唔通龍頭公司反而冇咁好？古勝認為主要係窩輪作怪，好似國壽輪尋日有30億元成交，個個走晒去博反彈同炒業績，中正大戶下懷。

祖國仍會發展核電

假設日本核輻射慢慢平息，究竟跟住要買核電股、太陽能股抑或風電股呢？雖然各國都暫時拖住核能發展技術，但要滿足用電、慳電同減碳三樣需求，捨核電誰屬？所以估計等事件丟淡之後，祖國核電計劃又會重新啟動，所以祖國核電股今次係低吸機會。

不過，歐洲民意大過天，核電嘅部分生意會畀再生能源搶咗，而光伏上游企業會受惠，尋日保利協鑫（03800）再升7%創新高。至於風電股就受上電網條件限制，有着數亦係有限，金風（02208）連續兩支大陰燭。股價已話畀你知孖屐嘅睇法。

中國金石礦業（01380）上市第3日大暴走，但只係啱啱浮上水面。新股一向好難玩，但部分舊年尾到今年初上市嘅半新股可以留意，佢哋做一○年盈利預測時特登較為保守，到派成績表時就可以乘機炒一轉，近期環球乳業（01007）係一例，喺低位反彈咗四成。另有隻寶峰（01121）舊年頭三季已賺1.05億人仔，但全年只係估賺不少於1.1億人仔，即係第四季只係賺500萬？

暴利稅有機會降低

尋日兩隻油股表現唔錯，騷亂已去到中東，就算日本地震影響需求，但油價只短暫跌穿100美金已企穩，連溫總都話覺得「意外和吃驚」，古勝就擔心佢會有排驚。不過，油股炒嘅係降低暴利稅要求，中石油（00857）舊年賺1,400億人仔，計落一日就賺3.8億，但公司CFO話舊年交咗2,975億稅，即係阿爺賺嘅係中石油兩倍，阿爺先至係暴利！

對於降低暴利稅都講咗好耐，正如資源稅改革亦係有排傾，瑞銀同瑞信嘅研究報告都有提到今年有機會提高暴利稅起徵點。中石油管理層已落力向阿爺游說，包括降低暴利稅、天然氣加價同優化成品油定價機制，其實要求並唔算過分，因為中石油入口天然氣一路蝕緊錢，而成品油定價根本就唔合乎環境。總之，中石油都有幾多可炒概念，望佢破咗11.2元嘅雙頂阻力，有機會見12蚊。

古勝