真實個案。投資者啱啱贖番一隻歐洲基金，成功收到一筆歐元現金。之後，佢打算用呢筆資金投資喺一隻用美元結算嘅中國基金度，但為免麻煩，佢冇即刻將手頭上嘅歐元兌換成美元，而選擇直接用歐元認購呢隻中國基金。幾日之後，美元匯價急升，搞到其他兌美元貨幣下跌，該名投資者就因為手頭上金額唔夠，被要求補錢去買原來嘅基金。
若投資者手頭上有嘅貨幣並唔係投資基金嘅結算貨幣，就要承受一定嘅匯率風險。以上述個案為例，假設投資者原本持有8,000歐元，以當時1歐元兌1.3美元嘅匯價計算，金額應相當於10,400美元。
可惜，投資者冇選擇即時將歐元兌換成美元，又遇到美元急升，所以搞到要補番兌換差額。假設歐元匯價之後跌到去1歐元兌1.25美元，投資者手上持有嘅8,000歐元，就只可以換到10,000美元；換言之，佢就要補番400美元差價。
投資者喺計劃投資外幣結算嘅基金時，最好先將手頭上有嘅資金兌換成結算貨幣嚟減少相關嘅外匯風險。投資者亦要注意由決定買入基金，至正式買入基金之間嘅時間差，因為呢段時間正正就係需要承擔外匯風險嘅時期喇！
香港大學電子金融服務榮譽助理教授 徐燦傑
（作者為註冊持牌人士）