「股神」巴菲特及美國首富蓋茨喺去年九月到中國游說億萬富豪捐出一半財富支持慈善，雖然中國富豪鮮有回應，但股神冇放棄，未來一周佢會與蓋茨到印度，繼續佢哋嘅募捐行動。
根據股神喺美國募捐嘅慣例，佢通常會喺《福布斯》富豪榜搵游說對象，睇番福布斯全球億萬富豪榜頭十名，有兩位印度富豪分別排第6及第9位，前者係現居於倫敦嘅鋼鐵大亨米塔爾，後者係Reliance Industries嘅老闆安巴尼，呢兩位仁兄應該係股神游說對象之一。
印度今年經濟增長估計達8.6%，億萬富豪數目有55人之多，數目僅少於美國及中國，平均每人身家有45億美元，但印籍富豪出晒名好少參與募捐活動，叫作風保守嘅佢哋支持善舉，相信股神要出力游說喇。
（余絲韻）