滙豐搞職業講座女強人過料「90後」
滙豐趁住國際婦女節一百周年，與教育局搞咗個職業講座，由一班滙豐女高層向300位中學生分享經驗，唔知係咪打算向呢班「90後」教授如何成為女強人呢？
絲絲聽聞今次滙豐出動4個不同部門嘅女高層，包括可持續發展總監區佩兒、IT主管林少梅，環球銀行及資本市場部高級經理梁佩徽以及財務管理部高級財務經理劉詠彤。至於分享乜嘢題目，公關姐姐話佢哋會教授喺呢個男性主導嘅工作戰場中如何發揮所長。
可能依家女多男少，班同學仔都好擔心日後點樣突圍，不停咁問選擇職業嘅考慮、爭取機會、解決工作問題，最搞笑係問講者點解可以留喺滙豐咁耐。唔知係咪因為年代唔同，依家好多人轉工多過做嘢嘅時間，希望今次呢班「90後」聽完講座，可以學吓點樣發展自己嘅事業，唔好隨便浪費機會。
（余絲韻）