花旗郭偉略紮職谷品牌
近年幫花旗信用卡搞得有聲有色嘅郭偉略（Leo），據知已晉升為亞太區市場推廣總監，主攻品牌推廣；伍楊玉如（Maggie）就會接佢棒，出任環球個人銀行服務信用卡及無抵押信貸業務總監。
伍楊玉如接棒
絲絲記得，Leo喺○七年底才出任花旗信用卡總監，估唔到咁快又升職，而且係由花旗香港躍升至亞太區層面，證明咗佢呢幾年嘅成績有目共睹。至於Maggie本身做開信貸產品嘅風險管理，接手新工作應該冇難度。
大家可能會問，點解Maggie嘅新職銜咁長，好似與Leo以前嘅職銜有啲唔同，老友話，無抵押信貸業務本來由現時嘅銷售網絡及抵押信貸業務總監林智剛（Lawrence）睇開，或者花旗覺得信用卡本身已經係無抵押貸款嘅一種，所以喺去年底就將呢部分業務撥歸信用卡業務總監，令Lawrence可專心主攻按揭等業務。
（余絲韻）