市場熱線：五礦建設靜極思動

祖國加存款準備金率已愈來愈令人麻木，尋日內銀同內房股照升，但A股就上海升深圳跌，外圍繼續反彈，標普期指一路升緊10點左右，港股再唔反彈就天冇眼，呢個幾禮拜係業績期最後衝刺，內銀估計可以賺多兩成以上，應該可以帶起港股做番好啲，但四月可能又驚加息。

炒業績多做功課

二三線股已連彈3日，只要唔係業績差嘅股，無論係地震受惠股或者受害股都一樣升，尋日連富士康（02038）同聯想（00992）都升埋。中交建（01800）上個禮拜跌市亦表現硬淨，尋日有突破迹象，古勝近日推介嘅中燃（00384）亦再升7%。

億和（00838）上周五臨尾5分鐘發難急升兩成，升得咁虛假，尋日回軟7.8%屬於正常，公司衰在未有發通告講日本地震對佢嘅影響，但公司有唔少係日本電器同相機客戶，所以難免有戒心。

至於中港照相（01123）尋日反彈7%，既然香港人已經唔敢食魚生同和牛，咁唔敢用日本護膚品亦唔出奇，呢兩隻股可能仲有「餘震」。

尋日有39間公司派成績表，淨係食晏時間亦有9間，月尾更加密集，一時間好難消化，炒業績要睇好多因素：行業環境、近期股價走勢以及孖屐氣氛，例如魏橋（02698）公布業績後PE得5倍幾，仲帶起埋其他紡織股，但提醒大家紡織股一向PE都係咁低。

內房股舊年成績表普遍唔錯，所以近日升勢亦幾勁，尋日推介嘅恒大（03333）下周二業績當然要留意，另一間喺下周一公布業績嘅五礦建設（00230）亦有睇頭，公司舊年合約銷售額比○九年大升4.5倍至25.7億元人仔，銷售面積亦稍為超標，而且均價達12,300蚊人仔，升幅達112%，管理層仲有信心今年無論合約銷售金額同面積都可以翻一番，分別達50億人仔同50萬平方米。

受惠母公司重組

尋日五礦系另一公司五礦資源（01208）更升超過9%，五礦集團傳搞整體上市，成個集團共有9間上市公司，包括5間A股、3間H股同1間澳洲，舊年尾已成立一間新公司五礦股份，計劃1年內登陸A股，五礦股份包埋晒黑色金屬、有色金屬、物流、金融、房地產、科技等業務，會通過吸收合併方式達到整體上市目的。

不過，如果將其他上市公司全部合併落去嘅話會有一定技術問題，究竟點搞法仲未有定案，但旗下公司不妨多加留意，五礦資源話明會做海外礦產旗艦，至於五礦建設相信亦唔會被冷落，無論炒業績或炒重組都係財路。

戰報

萬德資源（08163）+25%

萬德資源近日落鑊，古晨上周三已叫吼實，當日低位0.113元上車，昨日0.142元食胡，賺25%。

中交建（01800）+15%

帥哥本月九日推介隻中交建，當日低位只係6.32元，尋日升抵7.29元，跟到足可賺超過15%。

古勝