今次「十二五」規劃綱要草案一出，令我完全感受到好似Eason舊歌──黃金時代一樣咁有氣勢同震撼力。全因今次，香港第一次喺成個計劃上出現，阿爺表明打造香港金融市場上嘅黃金時代，將佢喺金融大哥、人民幣離岸同國際性資產管理上以「三路雄師」列陣，而香港服務業又同時向廣東省出發，都咪話唔犀利。
阿爺開口「點名力撐」，其實意義重大，中國人最鍾意「愛不出口，只會出手」，一出手，認同能力非同小可，加上全世界都鍾意將上海同香港比，香港金融市場成日就「你有你講，我有我撐」，今次再一次肯定話畀大家聽，香港同上海已經由競爭對手結成盟友（正如筆者先前所寫嘅文章，港交所（00388）「升呢」戰番邦一樣），實在係世界上金融市場上最完美嘅雙打。
正所謂「槍口對外」，有時候最緊要係大家兄弟「講掂數」，唔好兄弟相殘，最終「老番得利」，咁樣先至可以做到治國同平天下。如果各位有留意我之前寫嘅文章，港交所嘅中港股市同步已經喺今個星期開始，加上阿爺出言力撐香港金融市場喺佢心目中嘅王者地位，假設我哋相信50年不變，我諗港交所「升呢」行動因為阿爺出手而應聲而起。
香港大學電子金融服務榮譽助理教授 徐燦傑