內地人愈嚟愈有錢，佢哋除咗追求豪宅、名車外，對藝術品亦同樣鍾情。前日內地就舉行咗農曆新年後嘅首場藝術品大型拍賣會，其中一件由已故中國現代繪畫大師徐悲鴻喺藝術鼎盛時期一九四三年創作嘅名畫《平川立馬圖》，就拍出全場最高價750萬元人民幣，投得嘅正係恒大地產（03333）許家印老婆丁玉梅。
許家印一向熱愛體育運動就好多人都知，至於佢老婆丁玉梅，聽講佢本身有收集藝術品嘅習慣，呢幅《平川立馬圖》由230萬人仔開始起拍，經一輪激烈競價，可知許太幾咁情迷啦！
當日拍賣會共拎咗469件中國書畫及236件瓷器出嚟拍賣，總成交率達78%，總成交金額就達1.2億人仔，當中至少有22件作品成交價超過100萬人仔。話時話，依家內地樓價咁貴，當然要有番咁上下嘅藝術品先可以襯得起啦！